.webp)
ब्युरो टीम: अनेक वर्षे शिवसेनेसोबत राहिलेले नेते आणि अपक्ष आमदार एकापाठोपाठ एक उद्धव ठाकरे यांची साथ सोडून जात असताना आता नेवासा मतदारसंघाचे आमदार शंकरराव गडाख यांनी मोठी घोषणा केली आहे. शंकरराव गडाख यांनी आपल्या कार्यकर्त्यांशी आणि मतदारसंघातील जनतेशी नुकताच संवाद साधला होता. त्यानंतर शंकरराव गडाख यांनी आपण शिवसेनेसोबतच राहणार असल्याची घोषणा केली आहे. शिवसेना आणि उद्धव ठाकरे यांच्यामुळे मला मंत्रिपद मिळाले. आपण आहोत तिथेच कायम राहणार आहोत. आपण कुठेही जायचे नाही, असे शंकरराव गडाख यांनी म्हटले. ते सोमवारी सोनई येथील कार्यकर्ता मेळाव्यात बोलत होते.
शिवसेनेला लागलेल्या गळतीच्या पार्श्वभूमीवर शंकरराव गडाख यांचा हा निर्णय उद्धव ठाकरे यांच्यासाठी थोडाफार का होईना पण दिलासा देणारा आहे. शंकरराव गडाख यांनी मेळाव्यात भाषण करताना विरोधकांनाही इशाराला दिला. आमच्या सहनशीलतेचा अंत पाहू नका, असे त्यांनी म्हटले. शिवसेनेसोबत शेवटपर्यंत राहिलेले अपक्ष आमदार, माजी मंत्री शंकरराव गडाख यांची सोनईत आज सभा पार पडली. मुसळधार पाऊस असतानाही या सभेला हजारो कार्यकर्ते उपस्थित होते.
सत्तांतर नाट्यात सहयोगी पक्षाचे एकटे गडाखच ठाकरे यांच्यासोबत उरले. त्यांनाही शिंदे गटाकडून संपर्क झाला होता. मात्र, शंकरराव गडाख शिवसेनेसोबतच राहिले होते. त्यानंतर शंकरराव गडाख यांनी फेसबुकवर एक पोस्ट टाकली होती. मला आपल्याशी बोलायचंय..! नमस्कार, गेल्या काही दिवसांपासून घडलेल्या घटना, त्यातूनन झालेले आरोप-प्रत्यारोप, सध्या निर्माण झालेल्या राजकीय घडामोडीवर मला आपणा सर्वांशी संवाद साधायचा आहे. सोमवारी ११ जुलै २०२२ रोजी सकाळी ९.३० वाजता मुळा पब्लिक स्कूल, सोनई येथे आवर्जून उपस्थित रहावे ही विनंती, असे आवाहन त्यांनी या पोस्टमध्ये केले होते. त्यामुळे शंकरराव गडाख शिवसेनेसोबत राहणार की एकनाथ शिंदे गटात सामील होणार, याची उत्सुकता सर्वांना लागली होती. अखेर शंकरराव गडाख यांनी शिवसेनेसोबतच राहण्याचा निर्णय घेतला आहे.
आमदार नाराज होते, हे खरे असले तरी ही निधी देत कामे केली पण ते गेले. या नाराजीचा एवढा स्फोट होईल असे आम्हाला वाटले नव्हते. नवे मुख्यमंत्री एकनाथ शिंदे व उपमुख्यमंत्री देवेंद्र फडणवीस याचे अभिनंदन। त्यांना सहकार्य राहील, असे गडाख यांनी म्हटले. सोडून गेलेल्या आमदारांना मी काहीही बोलणार नाही. मलाही शिंदे गटाकडून फोन आला होता मात्र मी तिकडे न जाता ठाकरे यांच्या सोबत राहण्याचे ठरविले. गेले बरेच दिवस आजारी होतो, त्यामुळे कार्यकर्त्यांसोबत बोलणे होत नव्हते. त्यामुळे आज हा मेळावा घेतला. आम्ही कोणताही वेगळा निर्णय घेतला नाही, जेथे आहोत तेथे राहून काम करणार आहोत, असे शंकरराव गडाख यांनी स्पष्ट केले.
टिप्पणी पोस्ट करा