ब्युरो टीम : पुण्यात दिवसाढवळ्या ऐन गर्दीच्या ठिकाणी दोन टोळ्या एकमेकांना भिडल्याने खळबळ उडाली आहे.
टिळक रोडवर हा धक्कादायक प्रकार घडल्याचे समोर आले आहे. जोंधळे चौक भागात १० ते १२ जणांच्या दोन टोळक्यांनी एकमेकांवर हल्ला चढवला होता. तरुणांनी परस्परांवर कोयता आणि दगडाने वार करत मारहाण केल्याचं समोर आलं आहे. या हल्ल्याचं नेमकं कारण अद्याप अस्पष्ट आहे, मात्र पूर्ववैमनस्यातून हा हल्ला झाल्याचा प्राथमिक अंदाज वर्तवला जात आहे. दरम्यान, याप्रकरणी काही जणांना पोलिसांनी ताब्यात घेतलं आहे.
सपा महाविद्यालयाजवळील टिळक रोडसारख्या गजबजलेल्या परिसरात हा प्रकार घडल्यामुळे एकच खळबळ उडाली आहे.घटनेच्या वेळी रस्त्यावर अनेक जण उपस्थित होते, मात्र टोळीतील तरुणांची आक्रमकता पाहून कोणी मध्ये पडण्याची हिंमत केली नाही. बघ्यांनी ही घटना कॅमेरात कैद केल्यानंतर याचा व्हिडिओ सोशल मीडियावर व्हायरल झाला. उपस्थितांनी हा प्रकार जवळच्या पोलीस स्थानकात कळवल्यानंतर पोलिसांनी घटनास्थळी धाव घेतली. त्यानंतर त्यांनी काही जणांना ताब्यात घेतलं, तर जखमींना रुग्णालयात नेलं.
टिप्पणी पोस्ट करा