तू चाल पुढं’साठी या अभिनेत्रीने सुचवले दीपा परबचं नाव

    

ब्युरो टीम:  काही वर्षांपूर्वी छोट्या पडद्यावर लोकप्रिय ठरलेली 'दामिनी' मालिका आजही अनेकांच्या लक्षात आहे. या मालिकेत अभिनेत्री दीपा परबने साकारलेल्या भूमिकेनं प्रेक्षकांचं लक्ष वेधून घेतलं होतं. ती मध्यंतरीच्या काळात मोजक्या कलाकृतींमध्ये दिसली होती. कारण, ती तिचा सर्वाधिक वेळ कुटुंबाला देत होती. पण, आता ती पुन्हा एकदा मराठी मालिकेत मुख्य भूमिकेत दिसणार आहे.

       दीपानं मधल्या काळात अनेक हिंदी मालिकांमध्ये काम केलं होतं. आता दीर्घ कालावधीनंतर ती मराठी मालिकेतून प्रेक्षकांच्या भेटीस येतेय. 'तू चाल पुढं' असं या मालिकेचं नाव आहे. या मालिकेची कथा एका गृहिणीनं पाहिलेल्या मोठ्या स्वप्नांभोवती फिरते.

  या मालिकेत दीपा अश्विनीच्या व्यक्तिरेखेतून पुन्हा एकदा प्रेक्षकांच्या भेटीस येणार आहे. प्रोमोमध्ये सगळ्यांनी अश्विनीला पाहिलं .या मालिकेबद्दल व आपल्या भूमिकेबद्दल बोलताना दीपा म्हणाली की , 'झी मराठीकडून मला फोन आला. अभिनेत्री हर्षदा खानविलकरनं माझं नाव ह्या भूमिकेसाठी टीमला सुचवलं होतं. खरंतर कमबॅक करण्यासाठी मी वाटच पाहत होते आणि संधी चालून आल्यावर ती मी लगेच स्विकारली.

      या मालिकेत अभिनेत्री दीपा परबसह 'तुझ्यात जीव रंगला'मधील वहिनीसाहेब म्हणजेच अभिनेत्री धनश्री काडगावकर ही देखील महत्त्वाची भूमिका साकारताना दिसणार आहे.