शिवाजी महाराजांचे युद्धतंत्र सर्जिकल स्ट्राइकसाठी वापरले

ब्युरो टीम: 'पाकिस्तानमध्ये घुसून केलेल्या सर्जिकल स्ट्राइकसाठी आम्ही छत्रपती शिवाजी महाराज यांच्या युद्धनीतीचा वापर केला. रस्ते आम्हाला अगोदरच माहिती असल्याने अंधाऱ्या रात्री नियंत्रण रेषा ओलांडून पाकिस्तानमध्ये घुसलो. आमची तिन्ही पथके रात्री तीन वाजता थेट लक्ष्याजवळ पोहोचली. पुढील एका तासामध्ये चार वाजेपर्यंत केलेल्या सर्जिकल स्ट्राइकमध्ये जवळपास ८२ दहशतवाद्यांचा खात्मा करत भारतीय सैन्य माघारी फिरले. यामध्ये भारताचा एकही जवान शहीद झाला नाही. शत्रूला आमच्याविषयी आजिबात कळले नाही...' सर्जिकल स्ट्राइकचा हा थरार निवृत्त लेफ्टनंट जनरल राजेंद्र निंभोरकर यांच्या तोंडून ऐकताना ठाणेकरांच्यइ अंगावर रोमांच उभे राहिले.

        स्वातंत्र्याच्या अमृत महोत्सवानिमित्त ठाण्यातील गडकरी रंगायतनमध्ये शुक्रवारी निंभोरकर यांच्यासह निवृत्त एअर मार्शल अरुण गरुड आणि निवृत्त व्हाइस अॅडमिरल एस. व्ही. भोकरे यांच्या मुलाखतीचा कार्यक्रम पार पडला. तिन्ही सैन्यदलातील या निवृत्त अधिकाऱ्यांची ज्येष्ठ पत्रकार अशोक वानखेडे यांनी मुलाखत घेतली. गरुड यांच्यापासून मुलाखतीला सुरुवात झाली. हवाई दलामध्ये मिग २१ विमाने सर्वाधिक असल्याने या विमानांचा वर्षातून एखादा तरी अपघात होत असल्याचे गरुड यांनी सांगितले. या विमानांमध्ये एकच इंजिन असून आताच्या विमानांमध्ये सुरक्षिततेच्या दृष्टीने दोन इंजिन आहेत. मातृभूमीच्या सेवेसाठी सेना, हवाईदल आणि नौदलामध्ये दाखल होण्याचे गरुड यांनी आवाहन केले.

          निवृत्त लेफ्टनंट जनरल राजेंद्र निंभोरकर यांनी सर्जिकल स्ट्राइकचा थरार सांगितला. 'उरीमध्ये सैन्याच्या बेस कॅम्पवर दहशतवाद्यांनी केलेला हल्ला हा मोठा आघात होता. दहशतवादी हल्ल्यानंतर पाकिस्तानबरोबर क्रिकेट खेळणे आपण बंद करतो. अशा गोष्टींनी पाकिस्तानचे फार काही बिघडणार नाही, हे सर्वांना माहिती असूनही आपली भूमिका तेवढीच असते. मात्र, मला आश्चर्याचा धक्का बसला. संरक्षण मंत्री मनोहर पर्रीकर यांनी मला फोन करून काय करता येईल, असे विचारले. या हल्ल्याला प्रतिउत्तर देण्यासाठी आम्ही पर्याय दिले. या पर्यायाला मंजुरी मिळणार नाही, असे वाटत होते. पण त्यावर 'काय करायचे तुम्ही बघा. यश मिळाले पाहिजे,' असे पर्रीकर म्हणाले. त्यानंतर आम्ही सर्जिकल स्ट्राइक करत दहशतवाद्यांचा खात्मा केला. या स्ट्राइकसाठी छत्रपती शिवाजी महाराज यांच्या युद्धनीतीचा वापर केला. अंधाऱ्या रात्री तीन ते चार वाजता स्ट्राइक केला,' असे निंभोरकर म्हणाले

हा थरार ऐकून उपस्थित भारावून गेले. सर्जिकल स्ट्राइकच्या वेळी आम्हाला अत्याधुनिक शस्त्रे मिळाली तेव्हाच आमचे मिशन अर्धे यशस्वी झाले होते. आतापर्यंत भारताला मिळालेल्या संरक्षण मंत्र्यांपैकी मनोहर पर्रीकर सर्वोत्तम संरक्षण मंत्री होते, असेही निंभोरकर यांनी स्पष्ट केले.

पाणबुडीचे जग

      मी खेडेगावातील असल्याने समुद्र काय, कधी तलाव देखील बघितला नसल्याचे एस. व्ही. भोकरे यांनी सांगितले. पाणबुडी पाण्याखाली गेल्यानंतर काहीच दिसत नाही. तुम्हाला केवळ ऐकायला लागते. सोलरवर शत्रूच्या जहाजांच्या हालचाली ऐकू येतात. पाण्यात खोल गेल्यानंतर पाणबुडीवर दाब वाढतो. पाणबुडीमध्ये भोक पडून पाणी आतमध्ये आल्यानंतर दबाव आणखीनच वाढतो. अशावेळी खूप काळजी घ्यावी लागते. पाणबुडीमध्ये शॉर्टसर्किट झाल्यास किंवा वीज गेल्यास अंधारात पाणबुडी वरती आणता आले पाहिजे, असेही ते म्हणाले.

'आमच्यावर विश्वास ठेवा'

     पाकिस्तानमध्ये करण्यात आलेल्या सर्जिकल स्ट्राइकला राजकारण्यांनी 'फर्जिकल स्ट्राइक' म्हटले. त्यामध्ये दिल्लीचे मुख्यमंत्री अरविंद केजरीवाल देखील होते. मात्र, आम्ही सर्जिकल स्ट्राइकचे केलेले छायाचित्रण दाखवल्यानंतर कोणी काही बोलले नाही. भारतीय सेना, हवाई दल आणि नौदल तुमची आहे. सरकार कोणतेही असले तरी प्रत्येक कामामध्ये यशस्वी होऊन दाखवू. मात्र, आमच्यावर विश्वास ठेवा असे आवाहन निंभोरकर यांनी केले.