प्रधानमंत्री वय वंदना योजना; देशातील ज्येष्ठ नागरिकांना मिळेल भरगोस पेन्शन

ब्युरो टीम: प्रधानमंत्री वय वंदना योजना ही सामाजिक सुरक्षा योजना आणि पेन्शन योजना आहे. भारत सरकारने ४ मे २०१७ रोजी देशातील ज्येष्ठ नागरिकांसाठी प्रधानमंत्री वय वंदना योजना सुरू केली. ही योजना भारतीय आयुर्विमा महामंडळाद्वारे (LIC) चालवली जाते. वय वंदना योजनेचा मुख्य उद्देश देशातील ज्येष्ठ नागरिकांना पेन्शन उपलब्ध करून देणे हा आहे.

इतका व्याजदर

       प्रधानमंत्री वय वंदना योजनेत गुंतवणूकीची कमाल मर्यादा १५ लाख रुपये निश्चित करण्यात आली आहे. योजनेंतर्गत ज्येष्ठ नागरिकांना इतर योजनांच्या तुलनेत गुंतवणुकीवर अधिक व्याज मिळते. या योजनेत ६० वर्षे किंवा त्याहून अधिक वयाचे लोक मासिक किंवा वार्षिक पेन्शन योजना निवडू शकतात. मासिक पेन्शन योजना निवडल्यास १० वर्षांसाठी ८ टक्के व्याज मिळेल. तर वार्षिक पेन्शन निवडल्यास १० वर्षांसाठी ८.३ टक्के व्याज मिळेल.

गुंतवणूक कशी करावी

     प्रधानमंत्री वय वंदना योजनेमध्ये ऑनलाइन आणि ऑफलाइन दोन्ही अर्ज करू शकता. तुम्ही एलआयसीच्या अधिकृत वेबसाइटला भेट देऊन ऑनलाइन अर्ज करू शकता. पेन्शनचा पहिला हप्ता रक्कम जमा केल्यानंतर १ वर्ष, ६ महिने, ३ महिने, १ महिन्यानंतर मिळेल. तुम्ही कोणता पर्याय निवडता यावर ते अवलंबून आहे. गुंतवणुकीवर अवलंबून दरमहा १००० ते ९२५० रुपये पेन्शन दिली जाते. सर्व सामान्य विमा योजनांमध्ये मुदतीच्या विम्यावर १८ टक्के जीएसटी आकारला जातो. परंतु प्रधानमंत्री वय वंदना योजनेवर जीएसटी आकारला जात नाही. या योजनेंतर्गत गुंतवणूक करणाऱ्या नागरिकाकडून प्राप्तिकर कायद्याच्या कलम ८०सी अंतर्गत वजावटीचा दावा केला जाऊ शकत नाही. परताव्यावर प्रचलित कर कायद्यानुसार आणि वेळोवेळी लागू होणाऱ्या कराच्या दरानुसार कर आकारला जातो.

किती गुंतवणुकीवर किती पेन्शन

    ६० वर्षांच्या ज्येष्ठ नागरिकाला मासिक १,००० रुपये पेन्शन हवे असेल तर त्यांना १.६२ लाख रुपये गुंतवावे लागतील. या योजनेअंतर्गत जास्तीत जास्त ९२५० रुपये पेन्शन मिळू शकते. यासाठी ज्येष्ठ नागरिकांना १५ लाख रुपयांची गुंतवणूक करावी लागणार आहे.

अर्ज कसा करायचा

वय वंदना योजनेसाठी ऑनलाइन आणि ऑफलाइन दोन्ही अर्ज करता येतात. ऑनलाइन अर्ज एलआयसीच्या वेबसाइटद्वारे करता येतो. ऑफलाइन अर्ज करण्यासाठी तुम्हाला एलआयसीच्या शाखेत जावे लागेल.

आवश्यक कागदपत्रे

- आधार कार्ड

- पॅन कार्ड

- जन्म प्रमाणपत्र

- पत्त्याचा पुरावा

- उत्पन्न प्रमाणपत्र

- बँक खाते पासबुक

- अर्जदाराचा पासपोर्ट आकाराचा फोटो

- सेवानिवृत्ती पडताळणी दस्तऐवज

योजना परत करता येते

पॉलिसी घेतल्यानंतर काही दिवसांत तुम्हाला त्यात गुंतवणूक चालू ठेवायची नाही असे वाटत असल्यास, तुम्ही ती परत करू शकता. तुम्ही ही पॉलिसी ऑनलाइन खरेदी केली असेल तर ३० दिवसांच्या आत आणि ऑफलाइन पॉलिसीच्या बाबतीत १५ दिवसांच्या आत परत करू शकता.