ब्युरो टीम: केंद्रीय राज्यमंत्री श्रीपाद नाईक (Shripad Naik) यांच्या हस्ते गोवा स्टार पुरस्कार 2022 (अनुसूचित जाती) पुरस्कार प्रदान करण्यात आले. याप्रसंगी मुख्यमंत्री डॉ प्रमोद सावंत, विधानसभा सभापती रमेश तवडकर यांची उपस्थिती होती.गोवा स्टार पुरस्कार 2022 (अनुसूचित जाती) चे आयोजन रिबिल्ड इंडिया ट्रस्ट आणि अनुसूचित जाती कल्याण संघटनेने संयुक्तरित्या केले होते.
याप्रसंगी बोलताना श्रीपाद नाईक यांनी पुरस्कार विजेत्यांचे अभिनंदन केले. ते म्हणाले "पुरस्कार म्हणजे केलेल्या कार्याचे कौतुक असून समाजासाठी काही भले काम करु इच्छिणाऱ्यांसाठी प्रेरणा आहे. समाजातील सर्व घटकांचा विकास आणि कल्याण म्हणजेच देशाचा विकास होय" पुढे म्हणाले "पंतप्रधान नरेंद्र मोदी यांच्या नेतृत्वाखालील सरकार समाजातील शेवटच्या घटकाच्या कल्याणासाठी प्रयत्न करत आहे, आर्थिक समावेशनासह अनेक कल्याणकारी योजनांच्या माध्यमातून सर्वांगीण विकास साधण्यात येत आहे". मुख्यमंत्री डॉ प्रमोद सावंत यांनी "अनुसूचित जातीच्या कल्याणासाठी सरकारकडून सर्वतोपरी प्रयत्न केले जातील" असे याप्रसंगी सांगितले.
रिबिल्ड इंडिया ट्रस्ट आणि अनुसूचित जाती कल्याण संघटना यांच्या आगामी काळातील कृती आराखड्याचे देखील मान्यवरांच्या हस्ते प्रकाशन करण्यात आले. या प्रसंगी अभियांत्रिकी, शिक्षण, समाज सेवा, कला आणि संस्कृती क्षेत्रात उत्कृष्ट कार्य केलेल्या अनुसूचित जातीतील विविध क्षेत्रात नावलौकिक मिळवलेल्या व्यक्तींचा मानचिन्ह देऊन गौरव करण्यात आला व पुरस्कार देण्यात आला.
टिप्पणी पोस्ट करा