'पाश्चिमात्य देशांनी अनेक वर्षांपासून भारताला शस्त्रे दिली नाहीत' : परराष्ट्र मंत्री एस जयशंकर

 

परराष्ट्र मंत्री एस जयशंकर यांनी भारतीय लष्कराकडून रशियन शस्त्रास्त्रांचा वापर करत असल्याचे समर्थन केले आहे. ऑस्ट्रेलियात दाखल झालेल्या जयशंकर यांनी भारताला शस्त्रास्त्रांचा पुरवठा न केल्याबद्दल अमेरिकेसारख्या पाश्चात्य देशांवर निशाणा साधला आहे. जयशंकर यांनी या मुद्द्यावरून पाश्चिमात्य देशांना फैलावर घेतले. ते पुढे म्हणाले की, अनेक कारणांमुळे शस्त्रांची गरज वाढली आहे. जयशंकर म्हणाले की, 'पाश्चात्य देश अनेक दशकांपासून भारताला शस्त्रास्त्रे पुरवत नव्हते. भारताला शस्त्रे देण्याऐवजी पाश्चिमात्य देश पाकिस्तानच्या लष्करी हुकूमशाही सरकारला शस्त्रे देत आहेत. यामुळेच भारताला रशियाकडून शस्त्रे घ्यावी लागली.'

ऑस्ट्रेलियाचे परराष्ट्र मंत्री पेनी वाँग यांच्यासमवेत पत्रकारांना संबोधित करताना जयशंकर म्हणाले की, 'रशियासोबत आमचे दीर्घकाळ चांगले संबंध आहेत. आमच्याकडे सोव्हिएत आणि रशियन वंशाची पुरेशी शस्त्रे आहेत. जयशंकर यांनी त्यांचे समकक्ष पेनी वोंग यांच्याशी रशिया-युक्रेन युद्धावरही चर्चा केली. जयशंकर म्हणाले की, आम्ही युक्रेन आणि त्याचे इंडो-पॅसिफिक प्रदेशात होणारे परिणाम, क्वाडमधील प्रगती, जी-20 समस्या, आमची त्रिपक्षीय अशा अनेक मुद्द्यांवर चर्चा केली.' तसेच ते म्हणाले, 'आम्ही स्पष्टपणे युक्रेनमधील संघर्षाच्या विरोधात आहोत. पीएम मोदींनीही समरकंदमध्ये म्हटले होते की, हे युद्धाचे युग नाही.'

जयशंकर यांनी बेंगळुरूमध्ये ऑस्ट्रेलियाचे महावाणिज्य दूतावास उघडण्याची आशा व्यक्त केली आहे. ते म्हणाले की आम्ही गंभीर खनिजे, सायबर, नवीन आणि अक्षय ऊर्जा क्षेत्र अशा अनेक क्षेत्रात काम केले आहे. या वर्षीच्या जूनपासून आतापर्यंत भारताचे  6 केंद्रीय मंत्र्यांनी ऑस्ट्रेलियाचा दौरा केला आहे.