राष्ट्रवादी काँग्रेसच्या नेत्या सुप्रिया सुळे यांच्याबाबत राज्याचे कृषीमंत्री अब्दुल सत्तार यांनी नुकतंच आक्षेपार्ह विधान केलं आहे. सुप्रिया सुळेंच्या टीकेला उत्तर देताना सत्तारांची जीभ घसरली. त्यांनी चुकीच्या भाषेत टीका केली. सत्तारांच्या या टीकेनंतर राज्यभरात संताप व्यक्त केला जात आहे. राष्ट्रवादीच्या कार्यकर्त्यांनी सत्तारांच्या मुंबई येथील घरावर दगडफेक करत खिडकीच्या काचा फोडल्या.
आता कृषीमंत्री अब्दुल सत्तार यांची 24 तासांच्या आत मंत्रिमंडळातून हकालपट्टी करावी, अन्यथा सरकारला राष्ट्रवादी काँग्रेसच्या रोषाला सामोरं जावं लागेल, असा थेट इशारा राष्ट्रवादी काँग्रेसनं दिला आहे. राष्ट्रवादी काँग्रेसचे मुख्य प्रवक्ते महेश तपासे यांनी याबाबतचं एक पत्र मुख्यमंत्री एकनाथ शिंदे यांना लिहिलं आहे. यातून त्यांनी हा इशारा दिला आहे.
संबंधित पत्रात त्यांनी लिहले आहे, “ आपलया मंत्रिमंडळातील मा. कृषीमंत्री अब्दुल सत्तार यांनी राष्ट्रवादी काँग्रेसच्या नेत्या मा. सौ. सुप्रियाताई सुळे यांच्याविषयी अत्यंत खालच्या दर्जाची शिवीगाळ व आक्षेपार्ह व्यक्तव्य केलेले आहे, विरोधीपक्ष आणि सत्ताधारी पक्षांमध्ये महाराष्ट्र राज्याच्या राजकीय संस्कृतीचा एक धागा गेल्या अनेक वर्षांपासून जपला आहे. यामध्ये विरोधीपक्ष आणि सत्ताधारी पक्षांनी राजकारणापलीकडे जाऊन सौहार्दाचे वातावरण जपलं आहे. असं असताना आपल्या मंत्रिमंडळातील मंत्री अब्दुल सत्तार यांनी राष्ट्रवादीच्या नेत्या व खासदार सुप्रिया सुळे यांच्याविषयी केलेलं वक्तव्य अत्यंत अशोभनीय आणि असंस्कृत आहे. राष्ट्रवादी काँग्रेस पक्ष याचा तीव्र निषेध करतो.”
“खासदार सुप्रिया सुळे यांचा अपमान म्हणजे राज्यातील तमाम महिलांचा अपमान आहे. त्यामुळे अब्दुल सत्तार यांची तत्काळ हकालपट्टी करावी, अन्यथा राष्ट्रवादी काँग्रेसच्या रोषाला सामोरं जावं लागेल, असा इशारा राष्ट्रवादीचे प्रवक्ते महेश तपासे यांनी पत्रातून दिला आहे.
टिप्पणी पोस्ट करा