जोस बटलरच्या नेतृत्वाखालील इंग्लंडने श्रीलंकेवर 4 गडी राखून विजय मिळवून T20 विश्वचषक 2022 च्या उपांत्य फेरीत आपले स्थान निश्चित केले. ग्रुप-1 मधून न्यूझीलंडनंतर उपांत्य फेरीत पोहोचणारा इंग्लंड हा दुसरा संघ ठरला आहे. या सामन्यात प्रथम फलंदाजी करताना श्रीलंकेने इंग्लंडला 142 धावांचे लक्ष्य दिले होते, ही धावसंख्या इंग्लंड संघाने 2 चेंडू राखून पूर्ण केली.
नाणेफेक जिंकून प्रथम फलंदाजी करताना श्रीलंकेने निर्धारित 20 षटकांत 8 गडी गमावून 141 धावा केल्या आहेत. सलामीवीर निसांकाने श्रीलंकेला या धावसंख्येपर्यंत नेण्यात महत्त्वाची भूमिका बजावली, त्याने 45 चेंडूत 2 चौकार आणि 5 उंच षटकारांच्या मदतीने 67 धावा केल्या. निसांका व्यतिरिक्त फक्त भानुका राजपक्षे (22) 20 धावांचा टप्पा पार करू शकला. इंग्लंडकडून मार्कवुडने तीन बळी घेतले. इंग्लंडला उपांत्य फेरी गाठण्यासाठी 142 धावांची गरज होती.
142 धावांच्या लक्ष्याचा पाठलाग करताना जोस बटलर आणि अॅलेक्स हेल्स यांनी इंग्लंडला धमाकेदार सुरुवात करून दिली. पॉवरप्लेमध्ये इंग्लंडने एकही विकेट न गमावता 70 धावा जोडल्या होत्या. इंग्लंडला पहिला धक्का बटलरच्या रूपाने 75 धावांवर बसला. 28 धावांवर बटलर हसरंगाचा बळी ठरला. यानंतर या लेगस्पिनरने 10व्या षटकात हेल्सला 47 धावांच्या वैयक्तिक धावसंख्येवर बाद करून इंग्लंडला दुसरा धक्का दिला. इंग्लंडला तिसरा आणि चौथा धक्का अनुक्रमे ब्रुक्स (4) आणि लिव्हिंगस्टोन (4) यांच्या रूपाने बसला. 111 धावांवर 5 विकेट गमावल्यानंतर, बेन स्टोक्स पुन्हा एकदा इंग्लंडसाठी समस्यानिवारक ठरला आणि त्याने 42 धावांची खेळी खेळून आपल्या संघाला विजय मिळवून दिला.
टिप्पणी पोस्ट करा