ब्युरो टीम : कोळी समाजाच्या विविध मागण्यांसाठी आज धुळ्यामध्ये आक्रोश मोर्चाचे आयोजन करण्यात आले होते. यावेळी भाजपाचे आमदार गोपीचंद पडळकर यांच्या प्रमुख उपस्थितीत कोळी समाजाची सभा पार पडली. या सभेतून शरद पवार आणि संजय राऊत यांच्यावर टीका करताना गोपीचंद पडळकरांची जीभ घसरली. राज्यात विविध जमातींच्या विविध प्रश्नांवरती शरद पवारांनी घाण आणि नीच राजकारण केल्याचा आरोप गोपीचंद पडळकर यांनी केला.
आदिवासी कोळी समाजाच्या प्रश्नांवर आदिवासी विकास मंत्रीच गौडबंगाल करत असल्याचा घणाघाती आरोप गोपीचंद पडळकर यांनी केला. त्यांनी आदिवासी विकास मंत्री विजयकुमार गावित यांच्यावर निशाणा साधत घरचा आहेर दिला. आदिवासी जमातीसह ३३ जमातींवरती अन्याय करायला पवारांनी काही लोकांना जवळ ठेवलं होतं. संबंधित लोक आदिवासी जमातीचेच होते, असा दावाही पडळकरांनी केला.
धनगर समाजाच्या आरक्षणाला विरोध करणारे लोकही शरद पवारांच्या जवळचेच होते. या सर्वांचा सूत्रधार एकच आहे. म्हणून मी नेहमी पवारांवर बोलतो. शरद पवारांनी आधीपासूनच घाण आणि नीच काम केलं आहे, अशा शब्दात गोपीचंद पडळकरांनी शरद पवारांवर टीकास्त्र सोडलं. शिंदे-फडणवीस सरकार पडणार, असे म्हणणाऱ्या विरोधकांवरही गोपीचंद पडळकर टीका केली. शरद पवार आणि संजय राऊत या जीर्ण झालेल्या फाटक्या नोटा आहेत. या चलनात न चालणाऱ्या नोटा आहेत. त्यामुळे त्यांच्याकडे लक्ष देऊ नका. शिंदे-फडणवीस सरकार एकदम मजबूत आहे, असंही ते म्हणाले.
फडणवीसांनी पहाटेच्या शपथविधीवर केलेल्या गौप्यस्फोटावर भाष्य करताना पडळकर म्हणाले की, शरद पवारांचा चेहरा आधीच विश्वासघाताने, गद्दारीने आणि पाठीत खंजीर खुपसण्याने काळवंडला होता. मागच्या महिन्यामध्ये त्यांच्याच पक्षाच्या प्रदेशाध्यक्षांनी त्यावर शिक्कमोर्तब केलं. त्यानंतर देवेंद्र फडणवीसांनी एकच वाक्य बोलल्यानंतर शरद पवारांचा चेहरा आता डांबरासारखा काळा झाला आहे, अशा शब्दांत गोपीचंद पडळकरांनी टीका केली
टिप्पणी पोस्ट करा