ब्युरो टीम : पुणे महानगरपालिकेतर्फे कचरा संकलन करण्यासाठी भाडेतत्वावर घेण्यात आलेल्या ८० वाहनांचे लोकार्पण आज, सोमवारी (३ एप्रिल) राज्याचे उच्च व तंत्रशिक्षण मंत्री तथा जिल्ह्याचे पालकमंत्री चंद्रकांत पाटील यांच्या हस्ते करण्यात आले. ही वाहने शहर स्वच्छता आणि पर्यावरणाच्यादृष्टीने उपयुक्त ठरतील, असा विश्वास यावेळी पाटील यांनी व्यक्त केलाय.
शासकीय अभियांत्रिकी महाविद्यालयाच्या मैदानावर झालेल्या या कार्यक्रमाला मनपा आयुक्त विक्रम कुमार, अतिरिक्त महापालिका आयुक्त डॉ. कुणाल खेमनार, उपायुक्त आशा राऊत, महेश डोईफोडे, शहर अभियंता प्रशांत वाघमारे, कार्यकारी अभियंता गणेश उगले, कनिष्ठ अभियंता आशिष कोळगे आदी उपस्थित होते. याप्रसंगी चंद्रकांत पाटील यांनी शहरातील कचरा संकलनाविषयी माहिती घेतली. ओला आणि सुका कचरा वेगळा संकलीत करून सर्व कचऱ्यावर प्रक्रीया होत असल्याबद्दल त्यांनी समाधान व्यक्त केले. शहर स्वच्छ व सुंदर करण्यासाठी या नव्या वाहनांचा उपयोग होईल, असा विश्वासही त्यांनी व्यक्त केला.
कचरा संकलनासाठी स्वतंत्र वाहनांचा उपयोग
पुणे शहरात निर्माण होणारा ओला व सुका कचरा संकलनासाठी पुणे महानगरपालिकेतर्फे स्वतंत्र वाहनांचा उपयोग करण्यात येतो. या कचऱ्यावर १०० टक्के प्रक्रीया करण्यात येते. आता महापालिका कचरा संकलन प्रक्रीयेसाठी १०८ लहान वाहने, ९३ ओला कचरा संकलक वाहने आणि सुक्या कचऱ्यासाठी ५६ कॉम्पॅक्टर अशी एकूण २५७ वाहने भाडेतत्वावर घेण्यात आहे. त्यापैकी ८० वाहनांचे लोकार्पण करण्यात आले असून उर्वरीत महिन्याभरात महापालिकेच्या सेवेत दाखल होतील. महापालिकेची ५१८ वाहने पूर्वीपासून कार्यरत असून नवी वाहने आल्यानंतर शहरातील कचरा पूर्ण क्षमतेने एकत्रित करण्यात येईल. शहरात २५ ठिकाणी या कचऱ्यावर प्रक्रीया करण्यात येत आहे, अशी माहिती यावेळी देण्यात आली.
दररोज २ हजार १०० मे. टन घनकचऱ्याची निर्मिती
पुणे शहरात दैनंदिन सुमारे २ हजार १०० मे.टन घनकचरा निर्माण होतो. निर्माण झालेला कचरा महापालिकेमार्फत संकलीत करून त्याची विल्हेवाट लावण्यात येते. त्यासाठी महापालिकेने नवी वाहने भाडेतत्वावर घेतली आहेत. या सर्व वाहनांवर जीपीएस आणि आरएफआयडी उपकरणे बसविण्यात आली असून वाहनांच्या कामांची नोंद महानगरपालिकेतील नियंत्रण कक्षाद्वारे घेण्यात येणार आहे. या वाहनांवर ७ वर्षासाठी सुमारे ३२५ कोटी खर्च होणार आहे. ही सर्व वाहने बीएस-६ प्रदूषण मानांकनाची असून त्यामुळे प्रदूषण कमी होण्यास मदत होणार आहे. रिफ्यूज कलेक्टर (ओल्या कचऱ्यासाठीचे वाहन) वाहनाचे कचरा एकत्रित केल्यानंतरचे वजन १४ मे.टन असून कचरा वाहून नेण्यासाठी वाहनावर ७ क्यु.मीटरचा कंटेनर आहे. वाहनावरील हायड्रोलिक यंत्रणेमुळे मानवी हस्तक्षेप कमी होण्यास मदत होणार आहे.
टिप्पणी पोस्ट करा