Brijbhushansingh:ब्रिजभुषण सिंह यांच्या विरोधात चौकशीसाठी एसआयटी समिती नेमली; दिल्ली पोलिसांसमोर हजर, जबाबही नोंदवला

ब्युरो टीम: गेल्या दोन आठवड्यांहून अधिक काळ दिल्लीच्या जंतर मंतरवर भारताच्या कुस्तीपटूंनी आंदोलन पुकारले आहे. भारतीय कुस्तीपटू महासंघाचे अध्यक्ष ब्रिजभुषण सिंह यांनी महिला कुस्तीपटूंवर लैंगिक अत्याचार केल्याचा आरोप करण्यात आला आहे. याप्रकरणी दिल्ली पोलिसांनी गुन्हाही दाखल केला होता. आता याप्रकरणी ब्रिजभुषण सिंह यांनी दिल्ली पोलिसांसमोर हजर राहत जबाब नोंदवला आहे. तसंच ब्रिजभुषण सिंह यांनी त्यांच्यावर लावलेले सर्व आरोप फेटाळले आहेत. याप्रकरणी एएनआ या वृत्तसंस्थेने माहिती दिली.

पोलिसांनी दिलेल्या माहितीनुसार, कुस्तीगिरांनी तक्रार केल्यानंतर ब्रिजभुषण सिंह यांचा जबाब नोंदवून घेतला आहे. तसंच, त्यांच्याकडून काही कागदपत्रेही मागवण्यात आली आहेत. दरम्यान, याप्रकरणी पुढील चौकशीकरता एसआयटीची स्थापना करण्यात आली आहे. यामध्ये चार महिला अधिकारी आणि सहा पोलीस अधिकारी असणार आहेत. पोलीस उपायुक्तांच्या अध्यक्षतेखाली ही समिती स्थापन झाली आहे.

महासंघाचे सचिव विनोद तोमर यांचाही जबाब यावेळी नोंवण्यात आला आहे. दिल्ली पोलिसांच्या एफआयरमध्ये विनोद तोमरसुद्धा आरोपी आहे. ब्रिजभुषण सिंह यांना काही व्हिडीओ आणि मोबाईल डेटा सादर करण्यास सांगितला आहे. याप्रकरणाची चौकशी करण्याकरता दिल्ली पोलीस उत्तर प्रदेश, झारखंड, कर्नाटक आणि हरयाणा येथे गेले होते. तेथून त्यांनी काही पुरावे गोळा केले आहेत.

दरम्यान, गेल्या काही दिवसांपासून साक्षी मलिक, विनेश फोगाट आणि बजरंग पुनिया यांनी दिल्लीच्या जंतरमंतरवर आंदोलन पुकारले आहे. या आंदोलनाला देशभरातून चांगला पाठिंबा मिळत आहे. देशभारतील नागरिकांकडून पाठिंबा मिळण्याकरता काल (११ मे) त्यांनी सोशल मीडियावर एक हॅशटॅगही ट्रेन्ड केला होता. या हॅशटॅगला अनेकांनी प्रतिसाद दिला आहे. तसंच, ब्रिजभुषण सिंह यांना अटक होत नाही तोवर आम्ही येथून हलणार नसल्याचीही भूमिका या खेळाडूंनी घेतली आहे.