ब्युरो टीम : २७ जानेवारी १९८९ रोजी रिलीज झालेला अनिल कपूर, जॅकी श्रॉफ, माधुरी दीक्षित आणि डिंपल कपाडिया यांचा चित्रपट राम लखन बॉक्स ऑफिसवर ब्लॉकबस्टर ठरला होता. बॉलिवूडच्या इतिहासातील उत्कृष्ट चित्रपटांमध्ये या चित्रपटाचा समावेश करण्यात आला होता. इतकेच नाही तर १९८९ मध्ये रिलीज झालेल्या सलमान खानच्या 'मैंने प्यार किया' चित्रपटानंतर हा दुसरा सर्वाधिक कमाई करणारा चित्रपट ठरला होता. आज आम्ही तुम्हाला या चित्रपटाशी संबंधित एक किस्सा सांगणार आहोत, ज्याबद्दल फार कमी लोकांना माहिती आहे.
राम लखन हा चित्रपट सुभाष घई यांनी दिग्दर्शित केला होता आणि त्यांचे भाऊ अशोक घई यांनी या चित्रपटाची निर्मिती केली होती. या चित्रपटात अमरीश पुरी, परेश रावल आणि गुलशन ग्रोवर यांनी नकारात्मक भूमिका साकारल्या होत्या. या चित्रपटाच्या कथेसोबतच त्याची गाणीही प्रेक्षकांच्या पसंतीस उतरली होती. चित्रपटात एकूण सहा गाणी होती, त्यापैकी 'माय नेम इज लखन' हे गाणे सर्वाधिक लोकप्रिय होते. हे गाणे आजही प्रेक्षकांमध्ये खूप ऐकले जाते.
अनिल कपूर यांच्यासाठी करिअरला कलाटणी देणारा हा सिनेमा होता. या चित्रपटाच्या माध्यमातून त्यांनी प्रेक्षकांमध्ये वेगळी ओळख निर्माण करण्यात यश मिळवले. अनिल यांनी सिनेमात जॅकी म्हणजेच रामचा धाकटा भाऊ लखन याची भूमिका साकारली होती. या भूमिकेनंतर अनिल यांची लोकप्रियता आणखीन वाढली. चित्रपटात गुलशन यांनी 'केसरिया विलायती' या गँगस्टरची भूमिका साकारली होती, जो त्यावेळी खूप लोकप्रिय झाला होता. त्यांच्या 'बॅडमॅन' या डायलॉगमुळे गुलशन ग्रोवर यांची 'बॅडमॅन' हीच ओळख झाली
मीडिया रिपोर्ट्सवर विश्वास ठेवायचा झाल्यास, IMDB च्या रिपोर्टनुसार, अनिल कपूर आणि गुलशन ग्रोवर यांचे फाईट सीन करताना सेटवर भांडण झाले होते. भांडण एवढ्या टोकाला गेलं की भांडण थांबवण्यासाठी दोघांच्या मध्ये आलेल्यांचीही अवस्था बिकट झाली होती. असे म्हटले जाते की अनिल कपूरसोबत फाईट सीन करताना गुलशन यांच्या डोळ्याला दुखापत झाली, त्यानंतर दोघांमध्ये भांडण झाले. हे भांडण बरेच दिवस चालले आणि त्यानंतर दोघांनी बरीच वर्ष एकत्र चित्रपटात काम केले नाही. यानंतर बोनी कपूर यांनी दोघांमध्ये समेट घडवून आणला आणि त्यानंतर दोघांनी'लोफर' चित्रपटात एकत्र काम केलं.
टिप्पणी पोस्ट करा