.jpeg)
ब्युरो टीम : लोकसभा निवडणुकीसाठी इंडिया आघाडीच्या एकजुटीसह पक्षाच्या पातळीवरही काँग्रेसने जोरदार तयारी सुरु केली आहे. या प्रमुख विरोधी पक्षाने २०२४ च्या रणधुमाळीसाठी जी जाहीरनामा समिती जाहीर केली या १६ जणांच्या समितीत महाराष्ट्र काँग्रेसमधील एकाही नेत्याचा समावेश नाही. २०१४ लोकसभा निवडणुकीत देखील कॉंग्रेसचे राजीव सातव व अशोक चव्हाण हे दोनच खासदार निवडून आला होता, तसेच २०१९ च्या लोकसभा निवडणुकीत कॉंग्रेसचे बाळू धानोरकरांच्या रूपाने एकमेव खासदार निवडून आला होता.त्यामुळे काँगेसला महाराष्ट्राकडून लोकसभेत खासदार निवडून येण्याची शक्यता दिसत नसल्याने महाराष्ट्रातील एकाही नेत्याला केंद्रीय जाहीरनामा समितीत स्थान देण्यात आले नाही. दुसरीकडे निवडणुकीपूर्वीच्या मोठ्या फेरबदलात पक्षआने शनिवारी अनेक राज्यांच्या नवीन प्रभारींची नियुक्ती केली त्यात रमेश चेन्नीथला यांना महाराष्ट्राचे प्रभारी करण्यात आले आहे.
६६ वर्षीय चेन्नीथला हे केरळमधील ज्येष्ठ नेते आहेत. अलीकडेच महाराष्ट्र प्रदेश काँग्रेसमध्ये प्रदेशाध्यक्ष नाना पटोले यांच्या कार्यशैलीबद्दल अन्य नेत्यांमध्ये नाराजी उफाळून आल्यावर व विजय वडेट्टीवार, बाळासाहेब थोरात आदींनी त्याबद्दल थेट १०- जनपथ कडे गाऱ्हाणे मांडल्यावर पक्षाध्यक्ष खर्गे यांनी यंदाच्या फेब्रुवारी महिन्यात राज्यातील पक्षनेत्यात समन्वय साधण्याची जबाबदारी याच चेन्नीथला यांच्यावर सोपवली होती. त्यांनी नंतरच्या प्रत्येक संसद अधिवेशनात पक्षाच्या राज्यातील खासदारांबरोबर स्वतंत्रपणे चर्चा केली होती.
दरम्यान जाहीरनामा समितीत तांत्रिकदृष्ट्या महाराष्ट्रातून राज्यसभेवर गेलेले वरिष्ठ नेते पी चिदंबरम व महंमद इमरान खान उर्फ कवी इम्रान प्रतापगढी यांची नावे दिसतात. दोघांनाही मराठीचे वावडे दिसते व चिदंबरम तर हिंदीचे जाणकार असूनही जाहीरपणे हिंदी बोलण्यास दाक्षिणात्य राजकारणाने त्यांनाही मर्यादा आहेत.
काँग्रेस अध्यक्ष मल्लिकार्जुन खर्गे यांनी आगामी सार्वत्रिक निवडणुकांसाठी ही जाहीरनामा समिती स्थापन केली आहे. काँग्रेसचा जाहीरनामा तयार करण्यासाठी ही समिती काम करेल असे काँग्रेसचे सरचिटणीस (संघटन) के सी वेणुगोपाल यांनी सांगितले. या १६ सदस्यीय समितीमध्ये यात राहुल गांधी यांच्या नावाचा समावेश नसला तरी प्रियंका गांधी यांच्या रूपाने गांधी घराण्याचे प्रतीनिधीत्व यात आहेच. याशिवाय कर्नाटकचे मुख्यमंत्री सिद्धरामय्या, जयराम रमेश आणि शशी थरूर यांचा समावेश असेल. नसल्याचे दिसले. जाहीरनामा समितीचे नेतृत्व चिदंबरम यांच्याकडे सोपवण्यात आले असून छत्तीसगडचे टी एस सिंहदेव हे समन्वयक असतील. याशिवाय आनंद शर्मा, गायखंगम, गौरव गोगोई, प्रवीण चक्रवर्ती, के राजू, ओंकारसिंग मरकाम, रंजीत रंजन, जिग्नेश मेवाणी आणि गुरदीप सप्पल यांचाही जाहीरनामा समितीत समावेश आहे.
दरम्यान काँग्रेसने लोकसभा निवडणुकांसाठी इंडिया आघाडीतील पक्षांबरोबर जागावाटपावर चर्चा करण्यासाठी मोहन प्रकाश यांच्या अध्यक्षतेखाली पाच सदस्यीय राष्ट्रीय समिती स्थापन केली तीत अशोक गहलोत आणि भूपेश बघेल या दोन माजी मुख्यमंत्र्यांचाही समावेश करण्यात आला आहे. ज्येष्ठ नेते सलमान खुर्शीद आणि मुकुल वासनिक यांचाही यातच समावेश आहे.
काँग्रेसने पक्षसंघटनेत शनिवारी संध्याकाळी जे मोठे फेरबदल जाहीर केले त्यानुसार चेन्निथला यांच्याकडे महाराष्ट्राची जबाबदारी देण्यात आली आहे. प्रियांका गांधी यांना पक्षाच्या उत्तर प्रदेश प्रभारी पदावरून मुक्त करण्यात आले आहे. सचिन पायलट यांना छत्तीसगड काँग्रेसचे प्रभारी बनवण्यात आले आहे. काँग्रेस नेतृत्वाने प्रियांका यांच्या जागी पक्षाचे महासचिव अविनाश पांडे यांच्याकडे उत्तर प्रदेश प्रभारी पदाची जबाबदारी देण्यात आली आहे. मुकुल वासनिक यांच्याकडे गुजरातची तर रणदीप सिंह सुरजेवाला यांच्याकडे कर्नाटकची जबाबदारी दिली आहे. जयराम रमेश आणि वेणुगोपाल यांना यांना प्रभारी महासचिव म्हणून नियुक्त करण्यात आले आहे.
टिप्पणी पोस्ट करा