ब्युरो टीम: राष्ट्रवादीचा अजित पवार गट भाजपसोबत गेल्यापासून ज्येष्ठ नेते छगन भुजबळ हे राष्ट्रवादीचे सर्वेसर्वा शरद पवार यांच्यावर निशाणा साधताना दिसतात. आताही त्यांनी राष्ट्रवादीच्या शरद पवार गटाला टोला लगावला आहे. निमित्त, राष्ट्रवादीचे नेते जितेंद्र आव्हाड यांनी प्रभू श्रीरामांबद्दल केलेल्या वक्तव्याचं… प्रभूराम हे मांसाहारी असल्याचं वक्तव्य आव्हाडांनी केलं. त्यांच्या या वक्तव्यावर छगन भुजबळ यांनी भाष्य केलं. ‘अति शहाणा त्याचा बैल रिकामा’ ही म्हण आपण ऐकली आहे. पवार साहेबांचा जो उरला सुरला गट आहे. तो पक्ष संपवण्यासाठी दुसऱ्या कुठल्या पक्षाला काही करायची गरज नाही, असा टोला छगन भुजबळांनी लगावला आहे.
“पवारसाहेबांनी आशीर्वाद द्यावा”
शरद पवार यांनी आपल्यासोबत यावं असं आवाहन अजित पवार गटाकडून करण्यात येतं. भुजबळांनीही पुन्हा एकदा हे आवाहन केलं. अजितदादा पवारांनी सांगितलं आहे की, पवार साहेबांनी आम्हाला आशीर्वाद द्यावा. तर ते बरोबरच आहे. शरद पवारसाहेबांनी आशीर्वाद दिले तर सोन्याहून पिवळंच आहे, असं छगन भुजबळ म्हणाले.
लोकसभा निवडणूक तोंडावर आली आहे. त्यामुळे जागावाटपाच्या मुद्द्यावर चर्चा होत आहे. यावर जितेंद्र छगन भुजबळ यांनी प्रतिक्रिया दिलीय. आमचे 40 आमदार आहेत. जितकं त्यांना मिळतंय तितकंच आम्हाला मिळावं. कॅबिनेटमध्ये सगळी चर्चा होत नाही. मुख्यमंत्री एकनाथ शिंदे आणि उपमुख्यमंत्र्यांसमोर मी माझी भूमिका मांडली, असं भुजबळांनी म्हटलं आहे.
मराठा-ओबीसी आरक्षणावर भुजबळ म्हणाले…
सातत्याने कुणबी प्रमाणपत्र-दाखले चुकीची पद्धतीने सापडत आहेत. लिंगायत आणि इतर समाजाचे पण पाठवत आहेत. कुणाकुणाला दाखले देणार? आणि ओबीसीमध्ये आरक्षण देणार? हळू हळू मागण्या वाढत चालल्या आहेत. संपूर्ण मराठा यांना ओबीसी आरक्षण द्या, असं त्यांचं म्हणणं आहे. नवनिर्मित नेत्यांच्या मागण्या वाढत चालल्या आहेत, असा टोला भुजबळांनी मनोज जरांगे यांना लगावला.
15 दिवसात सर्वेक्षण होऊ शकत असेल तर संपूर्ण महाराष्ट्रात जातीय जनगणना करा. कायमचा प्रश्न संपवा 54 टक्के ओबीसी आहेत त्यात 27 टक्के आम्हाला मिळालं आहे. मराठा समाजाला वेगळं आरक्षण द्यायला आमचा विरोध नाही. पण ओबीसी कोट्यातून आरक्षण द्यायला आमचा विरोध आहे, असं भुजबळांनी म्हटलं आहे.
टिप्पणी पोस्ट करा