Prakash Ambedkar : छत्रपती संभाजी नगर मध्ये वंचित घेणार बदला; अफसर खान यांना दिली लोकसभेची उमेदवारी

 

ब्युरो टीम :  प्रकाश आंबेडकर  यांच्या वंचित बहुजन आघाडीकडून  तिसरी उमेदवार यादी जाहीर करण्यात आली आहे. विशेष म्हणजे छत्रपती संभाजीनगर लोकसभा मतदारसंघातून  काँग्रेसचे माजी नगरसेवक अफसर खान  यांना उमेदवारी जाहीर करण्यात आली आहे. अफसर खान यांनी मंगळवारी सकाळी काँग्रेसमधून वंचितमध्ये प्रवेश केला आणि रात्री त्यांना उमेदवारी जाहीर करण्यात आली. विशेष म्हणजे संभाजीनगरमध्ये एमआयएम आणि इम्तियाज जलील यांना शह देण्यासाठी प्रकाश आंबेडकरांनी अफसर खान यांना मैदानात उतरवले असल्याची चर्चा आहे. 

प्रकाश आंबेडकर यांनी संभाजीनगरमध्ये उमेदवार देतांना जलील यांच्या मुस्लीम मतांचा विचार करता शहरातील मुस्लीम नेत्याला संधी दिली आहे. तसेच, जलील आणि अफसर खान यांच्यातील वाद नेहमी चर्चेचा विषय ठरला आहे. अनेकदा अफसर खान यांनी जलील यांच्यावर गंभीर आरोप देखील केले आहेत. त्यामुळे जलील यांचा कट्टर विरोधक आणि त्यात मुस्लीम चेहरा रिंगणात उतरवून जलील यांची लढाई आणखी कठीण करण्याचा प्रयत्न आंबेडकरांकडून करण्यात आल्याची चर्चा आहे. 

एमआयएमचा बदला घेणार? 

मागील लोकसभा निवडणुकीत एमआयएम आणि वंचित बहुजन आघाडीमध्ये युती करण्यात आली होती. युतीमधील सर्वच उमेदवार जिंकून आणण्यासाठी 'वंचित'ने जिवाचे रान केले. मात्र, याचवेळी एमआयएमने संभाजीनगर लोकसभा मतदारसंघ सोडला तर इतर मतदारसंघांत 'वंचित'ला साथ दिली  नसल्याचा आक्षेप प्रकाश आंबेडकरांचे आहे. त्यामुळे राज्यात जलील सोडता एकही उमेदवार निवडून आला नाही. स्वतः प्रकाश आंबेडकर यांना देखील पराभवाचा सामना करावा लागला. त्यामुळे मागील लोकसभा निवडणुकीचा बदला घेण्यासाठी आणि राज्यातील एमआयएमचा एकमेव खासदाराचा पराभव करण्यासाठी वंचितने अफसर खान सारखा चेहरा शोधून काढल्याची चर्चा आहे. 

अफसर खान यांच्यामुळे जलील यांना किती फटका बसणार?

जलील यांच्या विरोधात वंचितने रिंगणात उतरवलेले अफसर खान यांच्या उमेदवारीमुळे जलील यांना किती फटका बसणार याबाबत देखील चर्चा होत आहे. मात्र, अफसर खान आणि जलील यांच्या जनसंपर्काचा विचार केल्यास अफसर खान हे फक्त शहरातील काही भागापुरते मर्यादित चर्चेत असतात. मात्र, खासदार असल्याने जलील यांची मागील पाच वर्षात शहरासह जिल्ह्यात च्नागली पकड निर्माण झाल्याचे चित्र आहे. तसेच, आदर्श बँक घोटाळ्याबाबत त्यांनी केलेल्या आक्रमक आंदोलनामुळे त्यांना फायदा होण्याची शक्यता आहे. सोबतच राजकीय घडामोडीमुळे जलील नेहमीच राज्याच्या राजकारणात चर्चेत असतात. त्यामुळे अफसर खान यांना जलील यांचा सामना करतांना आणखी जोमाने काम करावे लागणार असल्याची चर्चा आहे.