Back Pain : पाठदुखी ‘पाठ’ सोडेना? काळजी घ्या, अन्यथा...

 

ब्युरो टीम : पाठदुखीची समस्या आजकाल सामान्य झालीय. पाठदुखीची अनेक कारणे असली तरी त्यातही धकाधकीच्या जीवनामुळे ही समस्या वाढू लागली आहे. पण एखादा उपाय केल्यानंतरही तुमची पाठदुखी थांबत नसेल, तर ते गंभीर आजाराच लक्षण असू शकते.

आजकाल पाठदुखीच्या समस्येला अनेकांना सामोरं जावं लागतं. पाठदुखीपासून सुटका मिळावी, यासाठी विविध उपायही तुम्ही करीत असाल. परंतु पाठदुखीची समस्या दूर होत नसेल, तर तुम्ही सावधगिरी बाळगणं महत्त्वाचं आहे. कारण ही समस्या गंभीर आजारामुळेही असू शकते. त्यामुळे सततच्या पाठदुखीला हलके घेऊ नका, व ताबडतोब डॉक्टरांचा सल्ला घेऊन उपचार सुरू करा. कारण अशा समस्येकडे लक्ष न देणं, हे आजार आणखी गंभीर बनवू शकते. चला तर, सततची पाठदुखी नेमकी कोणत्या आजाराची लक्षणे आहेत, ते जाणून घेऊ.

हर्नियेटेड डिस्क

मणक्याच्या हाडांमधील अंतर या आजारामध्ये कमी होऊ लागते, व डिस्कच्या आतमध्ये असणारे नरम लिक्विड कमी होऊ लागते. ज्यामुळे डिस्क तुटण्याचीही शक्यता असते. फुगलेल्या किंवा तुटलेल्या डिस्कमुळे पाठदुखीचा त्रास होतो. याशिवाय मज्जातंतू आणि पाठीच्या कण्याशी संबंधित आजारांमुळे पाठदुखीची समस्या उद्भवते. स्नायूंचा ताण पडणे, हे देखील पाठदुखीचे कारण आहे. याकडे वेळीच लक्ष न दिल्यास ही समस्या भविष्यात गंभीर बनू शकते.

संधिवात

संधिवात म्हणजेच आर्थरायटिस, ऑस्टिओपोरोसिस आणि स्पॉन्डिलोआर्थरायटिसमुळे अनेकांना पाठदुखीचा त्रास होतो. तुम्हाला अशा प्रकारचा त्रास होत असेल, तर तुम्ही तात्काळ डॉक्टरांचा सल्ला घेणं महत्त्वाचं आहे.

दरम्यान, पाठदुखीची समस्या दूर व्हावी यासाठी सर्वात प्रथम पाठदुखीचं नेमकं कारण काय आहे, हे लक्षात घेणं गरजेचं आहे. तसेच यासंबंधी डॉक्टरांचा सल्लाही घेणे गरजेचे आहे.