ब्युरो टीम : काँग्रेसचे ज्येष्ठ नेते बाळासाहेब थोरात यांनी आज मंगळवारी (३ डिसेंबर) संगमनेर विधानसभा मतदारसंघातील पराभावाच्या पार्श्वभूमीवर स्नेहसंवाद मेळावा आयोजित केला होता. या मेळाव्यातून त्यांनी विरोधकांवर जोरदार टीका केली आहे. 'विरोधकांनी काही खोट्या एजन्सी तयार करून खोटे व्हिडिओ टाकून माझे बदनामी करण्याचे षडयंत्र रचले,' असा गंभीर आरोप थोरात यांनी यावेळी केला.
स्नेहसंवाद मेळाव्याला माजी आमदार डॉ. सुधीर तांबे, नाशिक पदवीधर मतदारसंघाचे आमदार सत्यजित तांबे, बाजीराव पाटील खेमनर, माधवराव कानवडे, हिरालाल पगडाल, डॉ जयश्री थोरात, वसीमभाई यावेळी उपस्थित होते.
थोरात म्हणाले,'१९८५ पूर्वी संगमनेर हे दंगलीचे शहर म्हणून ओळखले जायचे. परंतु ४० वर्ष सर्व समाजामध्ये आपण बंधूभाव निर्माण केला. एक आदर्श वातावरण तयार केले. मी ही हिंदू आहे. परंतु इतरांचा कधीही द्वेष केला नाही. मानवता हा धर्म पाळून काम करत आहोत. मी वारकरी संप्रदायाचा पाईक आहे. अनेक तीर्थस्थळ उभे केली आहेत. परंतु विरोधकांनी काही खोट्या एजन्सी तयार करून खोटे व्हिडिओ टाकून बदनामी करण्याचे षडयंत्र रचले,' असे सांगतानाच थोरात पुढे म्हणाले,'संगमनेर तालुक्याचा विकास मोडण्यासाठी नवीन लोकप्रतिनिधीचा हत्यार म्हणून वापर होणार आहे. हिंदू मुस्लिम द्वेष पसरून काहींनी राजकारण केले. मीही हिंदू आहे पण सर्व समाजाला सोबत घेऊन काम केले. मोठ्या कष्टातून तालुका उभा केला. दुष्काळी तालुका ते प्रगतशील तालुका असा लौकिक देशात पोहोचवला. सुसंस्कृत राजकारणाचा आदर्श पॅटर्न निर्माण केला.तालुक्यातील गोरगरिबांच्या जीवनात आनंद निर्माण करण्यासाठी राजकारण केले. कधीही कोणाला त्रास दिला नाही. कधी चुकीचा शब्द बोललो नाही. कुणाचे मन दुखवले नाही. निवडणूक संपली की राजकारण संपले अशी आपली पद्धत आहे. हीच परंपरा आपल्याला जपायची आहे. आपला सहकार चांगला आहे. बाजारपेठ चांगली आहे. शेती समृद्ध झाली आहे. बायपास, हॅपी हायवेसह बसस्थानक, शहरातील भव्यदिव्य इमारती आणि निळवंडे धरणातून थेट पाईपलाईन असे अनेक मोठमोठे प्रकल्प आपण राबवले आहे. काम केले त्याबद्दलची कृतज्ञता सर्वांनी ठेवली पाहिजे.'
टिप्पणी पोस्ट करा