ब्युरो टीम : काळजीवाहू मुख्यमंत्री एकनाथ शिंदे यांची प्रकृती बिघडल्याने ते ५ डिसेंबरला होणाऱ्या शपथविधी कार्यक्रमाला उपस्थित राहणार का? यावर सध्या राजकीय वर्तुळात चर्चा सुरू आहे. त्यातच आता याबाबत शिवसेनेचे आमदार संजय शिरसाट यांनी महत्त्वाची माहिती दिली आहे.
मंगळवारी (३ डिसेंबर) सकाळी मुख्यमंत्री एकनाथ शिंदे हे ज्युपिटर रुग्णालयात काही वैद्यकीय चाचण्या करण्यासाठी गेले होते. यानिमित्ताने संजय शिरसाट माध्यमांशी बोलत असताना त्यांना जर शिंदेंची प्रकृती ठीक नसेल तर ते ५ डिसेंबरच्या शपथविधीला हजर राहणार का? असा प्रश्न विचारण्यात आला. त्यावर शिरसाट म्हणाले की, 'शपथविधीला ते हजर राहणार की नाही? याबाबत डॉक्टरच ठरवू शकतात. त्यांची मनस्थिती कशी आहे, याबाबत डॉक्टरच सांगू शकतील. पण आमची सर्वांची इच्छा आहे की, एकनाथ शिंदे यांनी शपथविधीला हजर राहावे.'
दरम्यान, ज्युपिटर रुग्णालयात चाचण्या पूर्ण झाल्यानंतर एकनाथ शिंदे हे मुंबईतील वर्षा निवासस्थानी पोहोचले. तर, आज ठाणे येथे भाजपाचे नेते गिरीश महाजन यांनी शिंदे यांची भेट घेतली. या भेटीनंतर महाजन हे देवेंद्र फडणवीस यांना भेटण्यासाठी गेले. त्यामुळे या भेटीमागे नेमकं काय कारण होते? याबाबत आता चर्चा सुरू झाली आहे.
टिप्पणी पोस्ट करा