ब्युरो टीम : सैनिकी शाळा प्रवेश परीक्षा २०२५ चे ५ एप्रिल २०२५ रोजी दुपारी २ ते सायंकाळी ५ या वेळेत अहिल्यानगर उप विभागाच्या हद्दीतील ३ परीक्षा उप केंद्रावर आयोजन करण्यात आले आहे. उपकेंद्राच्या परिसरात कोणताही गैरप्रकार होऊ नये तसेच कायदा व सुव्यवस्था अबाधित रहावी यासाठी उप विभागीय दंडाधिकारी सुधीर पाटील यांनी अहिल्यानगर उप विभागाच्या महसुल स्थळसिमेच्या हद्दीतील परीक्षा उपकेंद्राच्या १०० मीटर परिसरामध्ये प्रतिबंधात्मक आदेश जारी केले आहेत.
द आयकॉन पब्लिक स्कूल, मल्हार चौक, स्टेशन रोड, वर्का स्कूल अँड जुनिअर कॉलेज, अरणगाव आणि अशोकभाऊ फिरोदिया इंग्लिश स्कुल अँड ज्युनिअर कॉलेज, अहिल्यानगर या तीन उपकेंद्राच्या १०० मीटर परिसरामधील सर्व सार्वजनिक टेलिफोन, एसटीडी. आय.एस.डी, फॅक्स केंद्र, ध्वनीक्षेपक, झेरॉक्स मशिन, स्कॅनिंग मशिन, मोबाईल फोन व इतर इलेक्ट्रॉनिक माध्यमे, वस्तु कार्यान्वित ठेवण्यात येऊ नयेत. परीक्षा उपकेंद्राच्या परिघामध्ये परिक्षार्थी म्हणून घोषित केलेले उमेदवार व परीक्षा पार पाडण्यासाठी सक्षम अधिकाऱ्यांनी प्राधिकृत केलेल्या व्यक्तीशिवाय इतर व्यक्तींना वाहनाने अथवा पायी फिरण्यास, उभे राहण्यास प्रतिबंध करण्यात आला असल्याचेही आदेशात नमूद करण्यात आले आहे.
टिप्पणी पोस्ट करा